تعرفو أكثر حكاية ياقف عليها التونسي شنوا ؟؟؟

أكثر حكاية هي الوقوف على الأطلال 

شكون فيكم مصارتلوش حكاية و قال ’’ يا ليت ‘‘ ؟؟ الكلنا قلناها الكلمة في إتجاهين ؛ يا ليتني عملت و يا ليتني ماعملتش .

قداش من واحد سمع نصيحة لكنو تصرف تصرف أخر مخالف لتلك النصيحة و بعد ما وقع فالفخ قال يا ليت سمعت آكا النصيحة و كان سمعتها من عند الي نصحني و طبقتها خاترها في مصلحتي راني ماحصلتش هكا و هاني تو وقفت على كلامو أما يا ليت و يا ليت ...

ناخذو مثال ؛ اليوم فالكرم فما حومة كاملة يلعنو فالغنوشي و النهضة ،، واحد منهم قلي ياليت تقص صبعي قبل ماننتخب النهضة ،، قلي في 2011 ضربنا بالبونية على النهضة و تو كان لا قدر الله و النهضة فازت بالتشريعية بش نخرجو نضربو بالبونية نخرجوها في خاتر صغارنا ،، يا ليت ...

نبعدو على السياسة تو و نحكو في الشؤون العاطيفية ؛ موش يقولو الطيبون للطيبات ؟؟ قداش من راجل حب طفلة و حرق الدنيا يخدم نهار و ليل بش وصل عرس بيها و في لخر مرتو تذوقو المُرار  حتى كي يطلق يقعد يعاني فيها الى من رحم ربي و هذا الكل خاترو حبها و مانجمش يستخايل حياتو بلاش بيها ياخي كيما يقولو فيها الي يحسب حسبة تطلعلو فقوسة ويقول يا ليت عفست على ڤلبي و نسيت حبها قبل ما نزيد نتورط هكا 

قداش من مرأة ضحت مع صاحبها و رضات بالقليل لا طلبت لا تشرطت كيما أندادها و عرست بيه و تسكن معاه في بيت صغيرة و مستحمدها خالقها ياخي راجلها طلع مشاءالله عليه يخدم نهار و يرقد عشرة و يبيتها للشر مع صغارها و زيد الفرنك الي يدبرو يشري بيه الزطلة و البيرة و يصرف فيه على صاحبتو و يكمل يروح لمرتو يمزبلها
و هي تولي تقول يا ليت بقيت بايرة و لا عشت هالعذاب 

==> اللوم بعد القضاء بدعة 

قداش من ‫#‏راجل‬ يوصل يحب طفلة و يحب يسترها و هي تقعد تغلط في حقو و كل مرة تغلط غلطة أكبر ملي قبلها و هو يسامح و يسامح و يزيد يسامح على خاتر حاجة وحدة هو إنو ’’ حبهـــــــــــــــــــــا ‘‘ و يوصل يستحمل الي مفماش حتى راجل ينجم يستحملو لكن أغلاطها ماشية و تكثر لين الذكريات الحلوة تفسخت أما الله غالب لقى روحو مع كل يوم يزيد يحبها أكثر أما وقتلي سايي معادش فيها و يلقى الكاس فاض و عاود تعبى و فاض مليار مرة يولي يقول يا ليت بعدت عليها من أول مرة ...

قداش من ‫#‏طفلة‬ شريفة تعرفت على طفل و خلاها تحبو حب جنوني معادش تشوف الدنيا بلاش بيه لكن تلقاه ولا مرة عاملها ربع معاملة طيبة و تلقاه واعدها بالعرس أما يصوحب عليها و هي طلع عاملها متع تضييع وقت لا يهتم بيها لا يخاف عليها و زيد حارمها من أبسط الأشياء تي يوصل حتى يفسدها و بعد يطيشها و هي تقول يا ليت كسحت قلبي و ما حبيت و ياليتني ...

قداش من راجل يكون راجل بأتم معنى الكلمة مع حبيبتو لكن هي ماتستاهلش الباهي الي عملو معاها والحب الي حبو ليها و الراجل هذكا يشوف قصة أخرى متاع ذكر يعذب في طفلة و هي قاعدة فالمستوى لين يقول يا ليت حبيبتي طلعت كيما الطفلة هذيكا ولا يا ليت الطفلة هذيكا هي الحبيبة و يقول بألم يا ليت عرفت شكون نختار ماللول ..

وقداش من طفلة تكون فالمستوى مع حبيبها لكن هو يطلع قليل أصل و يمرمدها و تشوف زوز أخرين كيفاش الراجل يكون سيد الرجال مع حبيبتو لين تتمنى إنو حبيبها كان مثل الراجل هذكا أو الراجل هذكا يكون هو حبيبها و تقول يا ليتني عرفت شكون نختار ماللول ...

مخ الهدرة ؛ الكلنا ناخذو قرارات في حياتنا لكن نوصلو نندمو عليها بقية حياتنا خاتر ما أحسناش الإختيار منذ البداية و على خاتر عطينا الأمل للمستحيل و على خاترنا ستحملنا و إخترنا بقلوبنا ليس بعقولنا ،، نصيحة أخوية دع العاطفة بعيدة في إختيار درب حياتك ،، و حاول قدر المستطاع تحرم نفسك من تو قبل ما تندم نهار أخر و تقول يا ليـــــــــــــــــــــت يوم لا ينفع النـــــــدم ..