حكاية عربي شمام الي جراير والديه قتل روحو بسكينة في قلبو

عربي تولد في عايلة رب عائلتها ( بوه ) إنسان معقد و الأم ماتنجمش تعمل حتى شي قدام الأب ،، عربي من صغرتو محبوس فالدار لا يخرج يلعب مع الصغار لا شي ،، حتى طهورو طهروه بساكتة ،، بوه علقلو حلقة في وذنو من صغرتو من ايامات المكتب إسمها ’’ نحبك ديما لول مكانش تاكل طريحة ‘‘ المهم الطفل عربي بوه يوصلو كل يوم للمكتب و يرجع يروح بيه و كل يوم فالعشية يسئل عليه المعلميين متاعو ،، حتى فالكولاج هكاكة و فالليسي نفس الشيء اما الحاجة الوحيدة الي تبدلت فالليسي إنو الطفل عربي يمشي يقرى و يروح بلاش بوه ،، عربي كيف الحيوان الأليف حياتو مبنية على 3 حاجات 1 - قراية 2 - فالليسي للدار و مالدار لليسي 3 - مايحكي مع حتى حد ،، الطفل عربي لبستو تقول متاع متشردين ،، في مخو ضرب مسكين ،، ديما في جيبو زيرو مليم ،، في نص النهار كي ماينجمش يروح للدار بش يفطر و يرجع خاتر ساعة شوي عليه يقعد للشر مسكين و كي تعطيه أنت حق كسكروت يعنقك و يبوسك و يفرح تقولش عليك عطيتو مليارين ،، في رمضان ملي يخرج مالليسي يجري ديراكت يعاون بوه الي تلقاه عامل برويطة يبيع فالزيتون و ماياخو حتى فرنك ،، اي دوفوار يهزو لبوه بش يرضيه عليه و حتى كي يجيب نوت خايبة في دوفوار و يعرف روحو بش ياكل طريحة ماينجمش يخبيه على بوه و يهزلو الدفوار هذكا و ياكلها الطريحة و يطلب السماح و يعمل مجهودو بش معادش يجيب نوت خايبة ،، فالباك عربي جاب 6 على 20 في دوفوار العربية ،، هز الدفوار لبوه و ياكل صيفة طريحة عالمية و بوه حلو 7 غرز في يدو الي يكتب بيها بسكينة اي نعم ضربو بسكينة في يدو الي جاب بيها 6/20 فالدفوار  صدقوني الناس الكل قالت كان لا قدر الله عربي مانجحش فالباك اتو بوه يقيم عليه الحد يشنقو و يقص لحمو يشويه ،، اه من ألطاف الله عربي نجح فالباك و تعدى يقرى في كومبيص منوبة ،، بعد بمدة صارت الشوشرة متاع النقاب و المتنقبات في منوبة و عربي لقاوه بوهالي هزوه يتظاهر معاهم و بالصدفة بوه يتفرج فالأخبار و شاف ولدو فالمسيرة ،، يمشي يجري لمنوبة و عطى طريحة لعربي قدام زملاؤو الطلبة و أمام أعين الجميع و كركرو كالكلب أمام أعين الجميع   عربي روح للدار مع بوه و الدموع في عينو و أثار الضرب زرقة في بدنو و القهرة و الذل عالفازة في قلبو ،، هز سكينة و دخل لبيت سكر الباب و الشباك و غرس السكينة في قلبو ،، بوه رتاح شوي و بدى يلوج على عربي بش يعاود يضربو ،، لوج عليه مالقاهوش ،، عرف الي عربي في بيت النوم مسكر الباب من داخل ،، عيط عليه بش يحل الباب و متحلف فيه أما عربي ماتكلمش ،، الاب كسر الباب و دخل يلقى ولدو راقد لوطى و السكينة مغروسة في قلبو أما عربي مزال يتنفس ، الأب جاهل بطبيعتو في عوض يتصل بالإسعاف ولا يحملو هكاكة بسكينتو و يجري بيه للسبيطار قام جبد السكينة بقوة و الدم تنطر بقوة و هكاكة الطفل عربي شخر و مات   الحيوان الأليف عربي شمام فاق على روحو بعد 23 سنة حيوانية لكنو فاق بالعكس و قتل روحو المهم بوه يقعد راضي عليه و خسر دنيتو و خسر أخرتو