شبينا ولينا مخيبنــــــــــــــــــــــــا ؟؟

ويني لمتنا و ويني ضحكتنا ؟ ويني محبتنا لبعضنا و ويني لُحمتنا ؟؟ نرجعو نتحسرو على أياماتنا ولا هم الدنيا غلبنا سايي و قلنا ماينا يا دُنيا ؟؟ تي أبسط حاجة قبل يا حسرة كنا عشرة كعبات معروفين نحلو الفايسبوك على خاتر بعضنا و الي يغيب ساعة نسئلو عليه ،، فالليل مصبحين في رمضان مصبحين مع بعضنا لا سهريات لا خرجات و كنا نعملو جو فالكبيرة و الصغيرة مع بعضنا بالرغم مانعرفوش بعضنا فالواقع و الي جمعنا كتاباتنا فقط ،، كان كي واحد منا تصيرلو حكاية و يديزاكتيفي الكونط متاعو الكلها تمركي بعضها في ستاتي وحدة شكون عندو نومرو تاليفون فولان و الي يخرج النومرو تلقى الناس الكلها تطلب و توصل تلح على فولان بش يرجع للفايسبوك خاتر غياب ليلة واحدة يخلي بلاصة فما بالك بغياب أيام و ليالي  ،، كي تقابلنا فالدنيا حسينا رواحنا إخوة تفرقو و هوما صغار و لمتهم الدنيا من جديد و هوما كبار ، عملنا نهار في الأسبوع نتقابلو فيه في قهوة مخلطين رجال و نساء بمختلف الأعمار و تلقانا نضحكو و نفدلكو بإحترام و صدقًا نعملو جو ينسينا في مشاغل جمعة كاملة أش خلانا نستنو في النهار الي بش نتلمو فيه بالدقيقة و الدرج ،، بعد غلطنا أكبر غلطة و دخلنا مناظر جديدة فالڤروب و ماكناش نعرفو إنهم رخويات مريضة ،، بالشوي بالشوي بدات المشاكل و بدى الكذب و النفاق و كثرت الكلاشات و حتى القدم فالڤروب تعبنا مالمشاكل لين معادش حتى حد يسئل على خوه ،، ويني كلمة فرار ؟؟ ويني كلمة أختي ؟؟ وينو و ويني ؟؟ تو الي تصيرلو مشكلة مانسمعوش بيها كان بعد بمدة ،، الي يديزاكتيفي الكونط ماتشلقش بيه ،، الي يموت ماتشلقش بيه  ،، كل مرة ينقص منا واحد كيف الي نعرفوه فالدنيا كيف الي نعرفوه فالإفتراضي أكهو ،، كل مرة يخرج واحد صالح و يدخلو عشرة طالحين ،، لاعاد حد يسئل على حد ولا عاد حد يفقد حد ،، أحنا الغالطين خاتر عرفنا عباد مرضى و يلزمنا نخلصو ثمن غلطتنا ،، كثرت الكلاشات لين معادش فما إبداع في كتاباتنا لين المخ تحرق أكثر مالحرقة الي ماكلتو ،، الفايسبوك معادش الموقع الإفتراضي الي نفرغو فيه قلوبنا و نواسيو فيه بعضنا ،، معادش الموقع الي ننسو فيه همومنا و نضحكو فيه ضحكة مالڤلب تفرهدنا ولو قليلاً ،، الفايسبوك كرهناه و زاد كرهنا في عيشتنا ،، بالرسمي مخيبنــــــــــــا